ڊاڪٽر الطاف جوکيو

الطاف جوکيو، ڊاڪٽر: محقق ۽ تعليمدان ڊاڪٽر الطاف حسين جوکيو سنڌ جي مشھور تعليمدان ۽ اديب، محبوب علي جوکيي جو وڏو فرزند آهي. سندس جنم 22 نومبر 1964ع تي محرابپور، ضلعي نوشھري فيروز ۾ ٿيو. ايم اي (سنڌي) ڪرڻ کان پوءِ 2015ع ۾، سنڌ يونيورسٽي ڄام شوري مان لسانيات جي موضوع: ”عربي-سنڌي صورتخطيءَ جي ترجيحي صورتن جو اڀياس“تي پي ايڇ ڊي جي ڊگري حاصل ڪئي. جنوري 1986ع کان هاءِ اسڪول ايجوڪيشن ۽ آگسٽ 1997ع کان ڪاليج ايجوڪيشن ۾ تدريس سان سلهاڙيل رهيو. هن وقت ائسوسيئيٽ پروفيسر جي حيثيت ۾، ڊاڪٽر اين اي بلوچ انسٽيٽيوٽ آف هيريٽيج ريسرچ جو ڊائريڪٽر آهي. سنڌي ٻولي، گرامر، لسانيات، صنائع بدائع ۽ لطيفيات جي موضوع تي هن 80 کان مٿي تحقيقي مقالا لکيا آهن، جيڪي تحقيقي جرنل ’ڪلاچي‘ (ڪراچي)، ’ڪارونجهر‘ (ڪراچي)، ’ڪينجهر‘ (ڄامشورو)، ’سنڌي ٻولي‘ (حيدرآباد)، ماهوار ’پيغام‘ ۽ ٽماهي ’مھراڻ‘ (ڄامشورو) ۾ شايع ٿيل آهن. سندس ڇپيل ڪتابن ۾: ’عربي-سنڌي آئيويٽا جو اڀياس‘ (2016ع)، ’عربي- سنڌي صورتخطيءَ جي ترجيحي صورتن جا اڀياس‘ (2017ع)، ’عربي-سنڌي اکر جو اڀياس‘ (2021ع) ۽ سنڌي درسي اشتقاقن جي تشريحي لغت (2022ع) شامل آهن. کيس ادبي خدمتن جي مڃتا طور سنڌي ٻوليءَ جي بااختيار اداري ۽ ٻين ادارن طرفان اوارڊ ملي چڪا آهن.

داخلا ۾ استعمال ٿيل تاريخون

1964.11.22  عيسوي

الطاف جوکيو جو جنم 22 نومبر 1964ع تي محرابپور تعلقي ڪنڊياري ۾ ٿيو

اديب - ڀاڱي جون ٻِيون داخلائون